Bosveld amper ‘tot niet’

Bosveld. Foto: www.galleryphoto.net

Die Bosveld – soos die meeste Suid-Afrikaners dit ken – is daarmee heen as die Eskoms, die Exxaro’s en die Sasols met hom klaar is. Só som ’n boer mismoedig die gemeenskap se gevoel op ná ’n vergadering tussen Eskom en lede van die Limpopo-omgewingsaksieforum (LEAF) buite Thabazimbi.

Nóg sowat vier kragsentrales (bykomend tot dié van Matimba en Medupi), honderde kilometer kraglyne, paaie en -verleggings, uitbreiding aan bestaande mynoperasies en nóg nuwe steenkoolmyne, raffinaderye, ontginning van ondergrondse gashulpbronne, sekondêre en tersiêre ontwikkelings wat met dié ontwikkelings verband hou, hoër bevolkings en verdere munisipale groei in Lephalale en die Steenbokpan-gebied is alles in die vooruitsig.

Niemand weet wat die presiese omvang en impak van die gesamentlike ontwikkelings gaan wees nie, want projekte word in afsondering gedoen en nêrens blyk oorhoofse planne beskikbaar te wees nie. Navorsingsinligting oor gepaardgaande lug-, stof- geraas en ander besoedeling is ook nog nie beskikbaar nie. Daar is veral ernstige kommer oor die beskikbaarheid van water.

Intussen het landbouverenigings van die Overberg ook onlangs met Eskom en plaaslike regeringsorganisasies vergader oor die beoogde kernkragsentrale by Bantamsklip. Die bepaling van die alternatiewe kraglyn-roetes vanaf Bantamsklip na die naaste hooflyne is bespreek.

Lees meer in Landbouweekblad se uitgawe van 11 Desember 2009.

Desember 2009