Brande kasty Wes-Kaap

Veldbrand. Foto: THEUNS BOTHA

Derduisende hektare fynbos, vrugteboorde, wingerde en besproeiingstelsels is in puin gelê in ’n aantal brande wat groot dele van die Wes-Kaap sedert Desember in ligte laaie laat opgaan het. ’n Man van die Overberg is ook dood nadat vlamme hom oorval het toe hy gehelp het om ’n brand te blus.

Mnr. John Europa, ’n plaaswerker, het omgekom nadat hy erge brandwonde opgedoen het toe hy met ’n trekker gehelp het om ’n brand naby Elim in die Overberg te bestry. Volgens mnr. Reinard Geldenhuys, die streek se rampbestuurshoof, is Europa deur die vlamme vasgekeer nadat die wind gedraai het.

Volgens mnr. Danie Wilds, brandweerhoof by die distriksmunisipaliteit Kaapse Wynland, het hulle sedert Desember 350 brande gehad. Die grootste daarvan was ’n brand wat in die Overberg ontstaan het en oor duisende hektare tot by McGregor versprei het.

Blombedryf geknou
Die brand het ongeveer vyf dae lank gewoed. Die Overbergse blombedryf is ’n kwaai knou toegedien nadat sowat 40 000 ha in die Pearly Beach-omgewing deur ’n vlammehel vernietig is.

Sowat ’n derde van die Kaap Agulhaspark is verwoes. Minstens vyf reuse-brande het in die  gebied ontstaan. Volgens Geldenhuys ervaar hulle ’n brandstigtingsprobleem in die Botrivier-gebied. Hoewel die ander brande ook nie natuurlik ontstaan het nie, sê hy dit was nie doelbewus gestig  nie.

Intussen is ‘n brand in die Stilbaai-omgewing wat sedert verlede week onder beheer gebring, luidens ‘n berig van IOL. ‘n Gebied van sowat 50 vierkante kilometer is in dié brand verwoes.

19 Januarie 2010