Brande in KZN, Vrystaat

‘n Brand het groot skade op vyf kommersiële plase in die Bishopstowe-omgewing in KwaZulu-Natal aangerig.

Luidens ‘n berig op Kwanalu.co.za het veevoer verbrand terwyl vrugtebome ook beskadig is.

Een van die plase behoort aan ‘n opkomende boer, wat onder meer 40 byekorwe verloor het. Die 47 jarige mnr. Fano Ngubane het ook voer vir sy diere, verskeie vrugtebome en ‘n kalf in die brand verloor.

Was nie by die huis nie
Ngubane, wat ook ‘n onderwyser is, was glo nie ten tyde van die uitbreek van die brand by die huis nie, maar by die skool. Hy het die middag ‘n oproep oor die brand gekry en met sy aankoms op die plaas het hy sy vee na veiligheid aangejaag, maar hy was te laat om die bye, voer of vrugtebome te red.

Sowat 80 makadamianeut- en avokadopeerbome is beskadig.

Vermoedelik het ‘n buurman vullis op sy plaas gebrand en dié brand het weens sterk winde buite beheer geraak. Die voorval is by die Polisie aangemeld.

Brande in Vrystaat ook
Intussen het ‘n ernstige veldbrand in die Viljoenskroon-distrik gewoed, luidens OFM. Die pad tussen Potchefstroom en Viljoenskroon moes tydelik gesluit word weens digte rook wat swak sig veroorsaak het. Luidens News24.com het 14 veldbrande Donderdag (2 September) regoor die Vrystaat skade aangerig.

Dié brande het plaasgevind op die pad tussen Potchefstroom em Johannesburg en in die Koppies-omgewing, by Sasolburg en op die N1 tussen dié dorp en Kroonstad, tussen Paul Roux en Bethlehem, by Boesmanskop en noord van Kestell.

3 September 2010