‘Brei plase uit om te oorleef’

Vir boerderye om te oorleef, sal plase in die toekoms al hoe groter moet word. Boonop sal tegnologie beter ingespan moet word om die wêreld van genoeg kos te voorsien, meen mnr. Ernst Janovsky, landbouhoof van Absa.

Hy het in ’n vooruitskouing vir die landbou gesê stygings in produksiekoste, internasionale verwikkelinge in die landbou en produksiebeperkinge op die natuurlike hulpbronne dui daarop dat net groot boere in die toekoms sal oorleef.

Volgens sy produksiemodelle kan ’n boer met 200 ha, waarvan 90% bewerkbaar is en 30% van die grondwaarde gefinansier word, net R25 000 per jaar maak om van te leef.  ’n Soortgelyke plaas van 500 ha kan R151 000 per jaar oplewer en een wat 1 000 ha is, sowat R482 000.

Hy sê die landbou beleef ’n era van konsolidasie. Hy stem saam met prof. Mohammad Karaan, dekaan van die fakulteit landbouwetenskappe aan die Universiteit Stellenbosch, dat daar teen 2040 net 7 500 groot boerderye in die land gaan wees.

“Dié boodskap sal by die Regering tuisgebring moet word. Kleinskaalse ontwikkeling werk nie meer nie.”

14 Desember 2009