Brief aan Pous oor plaasmoorde

As deel van 'n internasionale veldtog om aandag op die omvang van plaasmoorde in Suid-Afrika te vestig, is pous Johannes Paulus II onlangs in 'n brief versoek om hom daarteen uit te spreek.

Me. Adriana Stuijt, 'n Nederlandse joernalis wat lank in Suid-Afrika gewerk het en deesdae 'n vurige kampvegter teen plaasmoorde is, het die brief aan die pous gestuur. Briewe is ook vroeër aan regerings en menseregte-instansies in Nederland, België, Brittanje en Amerika gestuur.

As deel van die veldtog was daar staptogte oor die breedte van Engeland en in Suid-Afrika, sowel as vreedsame betogings in Dallas, Den Haag, Geneve en Pretoria.

Stuijt wys in die briewe daarop dat minstens 1 640 boere sedert 1991 in Suid-Afrika vermoor is. Sy verwys na bevindings dat 313 boere uit elke 100 000 van die bevolking in Suid-Afrika vermoor word. Volgens Interpol is boerdery in Suid-Afrika die gevaarlikste beroep ter wêreld.

Ná 'n nuwe vlaag van plaasmoorde die afgelope weke in Suid-Afrika, het die Demokratiese Alliansie opnuut gevra dat daar ernstig gekyk moet word na die vestiging van 'n gespesialiseerde landelike beveiligingseenheid binne die polisie. Dié party het onderneem om sy beleidsvoorstelle hieroor weer aan die Minister van Veiligheid en Sekuriteit, die Kommissaris van Polisie en die portefeuljekomitee vir veiligheid en sekuriteit te stuur.

Volgens die voorstel moet die eenheid se opleiding en take op landelike beveiliging gerig wees en hy moet regstreeks aan die kommissaris verslag doen.