Broodkartel: Pioneer met R195m. beboet

Die Mededingingstribunaal het Pioneer Foods met R195 miljoen beboet vir sy betrokkenheid by ‘n broodkartel.

Dit is die hoogste boete wat die tribunaal in die saak kon oplê en is bykans R100 miljoen meer as die boete wat Tiger moes opdok. Die boete kom neer op 10% van Sasko (Pioneer se bak-afdeling) se nasionale omset van 2006.

Kartelbedrywighede word deur die tribunaal as die mees blatante oortreding van die Wet op Mededinging (Wet 98 van 1998) geag en daarom is die hoogste moontlike boete opgelê.

Pioneer het weer versoek dat die boete slegs op sy Wes-Kaapse bedrywighede van toepassing sou wees. Beide versoeke is geïgnoreer.

Mnr. André Hanekom, uitvoerende hoof van Pioneer, sê vóór enige besluit geneem word, gaan hul eers die tribunaal se uitspraak bestudeer.

Die Mededingingingstribunaal het bevind Pioneer se hele verdediging is op valshede gesknoei. Die tribunaal het bevind dat mnr. Charl Goosen, hoof van Sasko se bakbedryf, nie net vir die tribunaal gejok het nie, maar erken het dat hy meineed gepleeg het.

Die broodbakker is verder oor die kole gehaal omdat hy geen poging aangewend het het om die saak self te ondersoek, onmededingende gedrag uit te roei of dissiplinêre aksie teen die betrokke werknemers te neem nie.

Só ‘n ondersoek is later wel van stapel gestuur, maar dit is nie openbaar gemaak nie. Pioneer het dit privaat gehou vanweë die regsaksie.

Lees ook:

Broodkartel: Die storie agter die skandaal

‘n Volledige berig verskyn in 12 Februarie se Landbouweekblad.

3 Februarie 2010