Chinese koeie lewer borsmelk

Chinese wetenskaplikes het glo melkkoeie geneties gemodifiseer om menslike borsmelk te kan produseer.

Luidens ’n berig op Sky News hoop die wetenskaplikes van die Chinese Landbou-universiteit in Beijing om dié melk oor drie jaar op winkelrakke te hê.

Die melk wat deur die koeie gelewer word, is glo dieselfde as die menslike variëteit, en dit bied dieselfde voordele vir die immuunstelsel as wat borsmelk bied.

Dolly die skaap
Die kudde van 300 koeie is geteel deur menslike gene in gekloonde koei-embrio’s in te spuit, waarmee surrogaatkoeie geïnsemineer is. Volgens die wetenskaplikes is die tegnologie wat gebruik is baie dieselfde as dit wat vir Dolly die skaap gebruik is.

Die melk ondergaan tans veiligheidstoetse, maar met die Chinese regering se goedkeuring sal dit aan verbruikers verkoop kan word as melk wat meer voedingswaarde het as gewone koeimelk.

Die wetenskaplikes sê wêreldwyd het 1,5 miljard mense nie genoeg kos nie, en dit is hul plig om wetenskap en tegnologie te ontwerp. “Ons moet die voeding van mense eerste plaas, voordat ons ideale en oortuigings in ag neem.”

Bron: Sky News

9 Junie 2011