DA vra nuwe grondhervormingsbeleid

Om Suid-Afrika se grondhervormingsproses suksesvol te maak is ’n totale nuwe strategie nodig, sê die Demokratiese Alliansie (DA).

Luidens ’n verklaring het die party Maandag (12 Desember) sy kommentaar oor die wetsontwerp ingehandig.

Die party meen dat die groenskrif oor grondhervorming, soos dit tans daar uitsien, nie die Regering se mikpunte sal bereik nie en dat bitter min daarvan te redde is.

“Die waarheid is dat mnr. Gugile Nkwinti, Minister van Landelike Ontwikkeling en Grondhervorming, moet terugkeer na die tekenbord as hy meer suksesvol as sy voorgangers wil wees.”

Die party se kommentaar bevraagteken ook die grondwetlikheid van die grondbestuurskomitee en die grondwaardeerder-generaal wat in die groenskrif voorgestel word.

“Ons vra ook of die Departement van Landelike Ontwikkeling en Grondhervorming steeds nodig is, aangesien die groenskrif so baie van die departement se funksies aan verskeie komitees en nuwe strukture toewys.”

Belangrike vrae
Volgens die party laat die groenskrif baie belangrike vrae onbeantwoord.

Dié vrae sluit in:

Wat is die Regering se strategie vir die herstrukturering van kommunale grondregte?
Wat sal die departement doen om te verseker begunstigdes ontvang doeltreffende ondersteuning?
Wat sal die rol van staats- en openbare grond in ’n geïntegreerde grondhervormingsmodel wees en wanneer sal die staat se grond-oudit voltooi wees?
Hoekom is die staat ’n voorstander van die regulering van grondeienaarskap deur buitelanders?
Hoe sal die voorgestelde beperking op private grond-eienaarskap daar uitsien?
Wat is die spesifieke voorstelle ten opsigte van die beginsel van gewillige koper/gewillige verkoper?
Wat gaan gedoen word om die prestasie en vermoë van die departement te verbeter?
Hoe gaan die staat reageer op die groeiende vraag na residensiële grond deur ’n samelewing wat ál meer verstedelik?

Werkgroepe
Die party versoek in sy kommentaar die departement om kundiges, die burgerlike samelewing en alle relevante belanghebbendes in te sluit in ’n proses om ’n behoorlike strategie vir Suid-Afrika se grondhervormingsproses saam te stel.

Die DA meen dat die ses werkgroepe wat tans na die situasie kyk nie die uitdaging behoorlik kan aanpak nie, aangesien hulle binne die grense van die reeds bestaande dokument moet werk, terwyl ’n nuwe strategie juis nodig is.

“Hierdie is ’n gulde geleentheid om eens en vir altyd ons grondhervormingstrategie reg te kry. Die Regering moet afsien van sy dogmatiek en fokus op innoverende, volhoubare en praktiese oplossings om diegene by te staan wat vroeër toegang tot grond geweier is,” lui die verklaring.

12 Desember 2011