De Doorns-kwessie ‘walglik’

“Die situasie in De Doorns is onsmaaklik en walglik”, het Agri Wes-Kaap se hoof-uitvoerende beampte, mnr. Carl Opperman, gesê.

Produsente in die area word geblameer dat hulle onwettige immigrante in diens neem, werkers minder as die minumumloon betaal en werkers in diens neem sonder wettige kontrakte, maar geen bewyse vir hierdie aantygings kom vorendag nie.

“Agri Wes-Kaap wil dit baie duidelik maak dat produsente volgens wet toegelaat word om werkers in diens te neem binne die land se wetgewing en die vryemarkstelsel wat ons in Suid-Afrika het. Agri Wes-Kaap produsente is ook verbind tot ‘n streng gedragskode en ons het geen afwyking van wetgewing of die gedragskode by enige Agri Wes-Kaap-lid in die Hexvallei gevind nie.

“Die huidige situasie het waarskynlik ontstaan uit beweringe van ‘n geveg tussen plaaslike inwoners en buitelanders en het ontaard in ‘n xenofobiese aanval op buitelandse immigrante wat verder aangevuur is deur aanstigters met beweerde politieke ondersteuning. Die aanvalle op onskuldige mense en die vernietiging van hulle persoonlike besittings en eiendom is onverskoonbaar en kon verhoed gewees het as die polisie onmiddelik op die eerste klagtes gereageer het. Ons dring daarop aan dat die regte oortreders geidentifiseer word en dat daar onmiddelik wetlik teen hulle opgetree word.”

Agri Wes-Kaap meen dat die plaaslike munisipaliteit die inwoners van die informele nedersetting gefaal het deur nie vir hulle behoorlike infrastruktuur en dienslewering te gee nie en dit het bygedra tot hulle ontevredenheid.

Produsente wat ‘n reuse-bydrae maak tot die ekonomie, vooruitgang en werkskepping in die area word geteiken en gedreig om die aandag af te lei van die kriminele element wat blykbaar die situasie in die eerste plek veroorsaak het. Ongeveer 14 000 werkers word tydens hoogseisoen in die Hexriviervallei in diens geneem en in hierdie uitdagend ekonomiese tye het produsente betroubare, doeltreffende en produktiewe werkers nodig. Produsente in die area handhaaf ook ‘n hoë waardestelsel op hulle plase en werkers word hiervolgens in diens geneem.

Opperman sê met betrekking tot die aantygings dat werkers minder as die minimumloon betaal word, wil Agri Wes-Kaap diegene wat die aantygings maak, uitdaag om die bewyse aan die Departement van Arbeid te gee sodat diegene wat na bewering hieraan skuldig is, ondersoek kan word. Produsente is nie die enigste direkte werkgewers in die Hexriviervallei nie, maar tog is hulle die enigste wat beskuldig word van onwettige optrede.

23 November 2009