Die Departement van Landbou, Bosbou en Visserye is nie meer in ‘n beswyming nie en het nou ‘n duidelike mandaat en werk na spesifieke doelstellings, het me. Tina Joemat-Pettersson, Minister van Landbou, Bosbou en Visserye, gesê.

Die bestuur van die departement onder die voormalige landbouminister, me. Lulu Xingwana, het boere boos gelaat omdat dit sy sig van die departement se primêre fokus verloor het. Joemat-Pettersson het op ‘n Parlementêre vraag oor die stand van die departement geantwoord dat die departement ‘n aantal projekte en programme gehad het wat nie gehelp het om die ongelykhede van die verlede aan te spreek nie en dat daar nie ‘n duidelike databasis van boere in die land is nie.

Boonop het die departement na 15 jaar voortgegaan om swart kleinboere as opkomende boere te definieer sonder enige duidelike plan om hulle oorgang na kommersiële boere te bewerkstellig. Sy het aangedui dat van die stappe wat intussen geneem was, is om die departement se fokusgebiede vir die volgende vyf jaar duidelik te stel en om te verseker dat daar ‘n gemeenskaplike begrip onder senior bestuur hieroor is.

‘n Nuwe visie, missie en waardestelsel is opgestel. Daar word nou gewerk om ondersteuningsmodelle vir die drie groepe boere - bestaans-, klein- en kommersiële boere - te ontwikkel om die landbou na volhoubare en groter hoogtes te voer.

13 November 2009