Derde opname van vloedskade in NK

Die Rietrivier buite Douglas. Foto: MARTHIE VAN DER WESTHUIZEN

’n Derde opname ná vloedskade word tans in die Noord-Kaap gedoen nadat vloedwaters die naweek weer skade daar aangerig het.

Mnr. Johan van Rensburg, hoof uitvoerende beampte van Agri Noord-Kaap, sê veral boere in die distrik Douglas het skade gely.

Die Rietrivier het sedert verlede Donderdag (9 Junie) onderkant Douglas se besproeiingsgebied baie hoog in die Oranjerivier ingevloei. Dié groot hoeveelheid water het egter veroorsaak dat die Oranje- en Vaalrivier hoër op opgedam het, wat skade aan die besproeiingsgebiede aangerig het.

“Niemand het dit verwag nie, die boere het dus nie noodwendig hul pompe geskuif nie. Dit veroorsaak nou weer vir die boere baie skade, want daardie pompe moet nou onder meer uitmekaar gehaal en drooggemaak word,” vertel Van Rensburg.

’n Verwagte piek van 6,2 m 
Mnr. Johannes Möller, voorsitter van Agri SA, sê volgens die Departement van Waterwese se jongste voorspelling sal die Oranjerivier Maandag (13 Junie 2011) by Upington sy piek teen 2 800 kumek bereik, wat ’n vlak van sowat 6,2 m sal wees.

Intussen sê mnr. Jors van der Westhuizen, ’n boer van die distrik Grootdrink, die Oranjerivier “styg steeds”, hoewel dit glo reeds sy hoogste vlak by Prieska bereik het sonder om sy walle te oorstroom. Hy sê hulle hou duim vas dat die rivier nie weer oor sy walle sal breek nie.

Beplanning is baie belangrik
Wat die moontlikheid van verdere vloede betref, sê Möller beplanning rondom die bestuur van damvlakke en die riviere deur die Departement van Waterwese gaan voortaan baie belangrik wees.

“Dit gaan bepaal wat alles in die volgende reëntyd gaan gebeur.”

Aan die gunstige kant sê Möller die baie water in die riviere kan help met die provinsie se hidroliese kragopwekkingsprojekte.

“Dit beteken ook dat boere in die gebiede wat geraak is die volgende twee jaar sonder reën goeie oeste sal kan kry.”

13 Junie 2011