Diefstal van krag: ‘Syfers verdag’

Eskom se statistiek, waarvolgens beweer word dat boere van die grootste kragdiewe is, is uiters verdag en hy daag Eskom uit om besonderhede oor sy opname bekend te maak, sê dr. Manie van Dyk, DA skadu-minister vir Openbare Ondernemings.

Van Dyk sê losse beweringe oor boere wat krag steel is, in die Parlement by die begrotingsdebat vir energie gemaak. Hy sê daar is dalk boere wat hulle wel aan kragdiefstel skuldig maak, maar hy wil weet op grond waarvan Eskom kan sê boere is die grootste kragdiewe.

Van Dyk het dié kwessie ook by die begrotingsdebat vir Openbare Ondernemings opgehaal. Hy het gesê volgens mediaberigte van 21 Augustus 2008 behels die diefstal van elektrisiteit jaarliks soveel elektrisiteit as die produksie by twee kragstasies met ’n gesamentlike opwekkingsvermoë van 7 200 MW. Die helfte hiervan is 3 600 MW.

Vra oor Eskom-statistiek
“Die hele landbousektor gebruik 3% van die land se elektrisiteit, wat neerkom op 1 200 MW. Hoe is dit dan moontlik dat boere 3 600 MW kan steel? Dit laat vrae ontstaan oor Eskom se statistiek.”

By vanjaar se Nampo-Oesdag het Eskom gesê grootmaatverbruikers was verlede jaar vir 66% van die totale kragdiefstal verantwoordelik en hiervan het 48% in die landboubedryf voorgekom. Agri SA sê egter geen onderskeid word getref tussen boere en ander verbruikers in landelike gebiede nie. Daarom word net boere uiteindelik verantwoordelik gehou vir die kragverliese in sekere gebiede.

Mnr. Johannes Möller, voorsitter van Agri SA, het gesê Eskom moet versigtig wees om net boere daarvoor die skuld te gee. Hy is ook nie oortuig van Eskom se syfers nie.

8 Junie 2011