Distell wil sterk rand se voordele benut

Suid-Afrika se grootste wyn- en spiritualieëmaatskappy, Distell, werk aan oplossings vir die impak wat 'n sterker rand op sy uitvoer het. Terselfdertyd probeer hy die kostevoordele benut wat die sterk rand ten opsigte van vataankope en ander produksiemiddele inhou. Ondanks 'n strawwe handelsomgewing, stel Distell sy visier op groeigeleenthede.

Dít blyk uit die oorsig wat sy bestuurshoof, mnr. Jan Scannell, by die maatskappy se jaarvergadering in Stellenbosch gelewer het. Wat plaaslike én internasionale volumes betref, het Distell in die verslagtydperk 5,5 % meer wyn verkoop, 3,4 % meer spiritualieë, maar 6,3 % minder gegeurde alkoholiese drankies. Sy internasionale wynverkope het egter met 18,9 % gegroei.

"Gelukkig, is minder as die helfte van Distell se buitelandse verdienste in Amerikaanse dollar, met die res in euro of ander geldeenhede wat nie in dieselfde mate teen die rand verswak het nie. Die verlaging in plaaslike rente- en inflasiekoerse sal die binnelandse mark na verwagting 'n hupstoot gee en verdere stukrag verleen aan handelsmerke wat oor die afgelope jaar buitengewoon goed gevaar het."

Daaronder tel die roomlikeur Amarula wat in die verslagtydperk 'n groei van 54 % in verkope in Kanada getoon het. Trouens, vanweë Suid-Afrika se groter gewildheid as 'n toeristebestemming neem die verkope van Amarula wêreldwyd toe.

Wat Distell se groeiprojek in Afrika-lande betref, vind hy nuwe geleenthede in ontluikende markte, soos Angola, (wat 'n geskatte BBP-groeikoers van 11,5 % het), sê mnr. Etienne Heyns, Distell se internasionale bedryfsdirekteur.

Mnr. Scanell het die "onopgeloste regulatoriese sake met die mededingingsowerhede" as nog 'n uitdaging uitgelig. "Vanuit 'n bedryfsperspektief het Distell die samesmelting (tussen Stellenbosch-Boerewynmakerye en Distillers) binne die voorskrifte van die regulatoriese owerhede afgehandel. Maar nou, ongeveer drie jaar later, het ons nog nie finaliteit oor mededingsaspekte nie. Ondanks die feit dat ons 'n finale kompromie met die Mededingingstribunaal bereik het, het ons nou die ongerymdheid dat die Mededingingskommissie, wat die samesmelting aanvanklik goedgekeur het, teen die Tribunaal se beslissing appèlleer," sê hy.