Droogte kan Langkloof R200 miljoen kos

Die vrugtebedryf in die Langkloof kan weens die ongunstige wisselkoers en die knou wat die droogte op vanjaar se oeste het, sowat R200 miljoen in buitelande valuta verloor, sê die Langkloof-boerevereniging.

Mnr. André de Wit, die voorsitter van die vereniging, sê vanjaar se oes het met tussen 30% en 35% gekrimp in vergelyking met verlede jaar.

“Sowat 80% van die vrugte is klaar geoes, maar die droogte het sy tol geëis. Die oes het weens klein of swak vrugte met tussen 30% en 35% gekrimp,” sê De Wit.

Wisselkoers knou erg
Volgens De Wit besorg die swak wisselkoers van die rand teenoor die dollar - asook ander geldeenhede - vir hulle groot kopsere. “Die wisselkoers is tans 31% swakker as wat dit verlede jaar was, en dit knou ons erg. As jy die oes-afname en dié wisselkoers se invloed saam bereken, kos dit die land sowat R200 miljoen in buitelandse valuta. En dit nét uit vrugte uit die Langkloof!”

Hy sê die Oos-Kaapse regering is al verskeie genader met versoek om hulp met die skade aan damme. “As ons net die damme, wat tydens die vroeëre vloede beskadig is, kan regkry, sal ons die droogte makliker kan hanteer. Maar ons hoor niks van die regering nie”, sê De Wit.

Hy sê Maandag het 12 mm reën oor ‘n groot gedeelte van die Langkloof uitgesak, “maar ons wag nog vir die groot reën. Hy’t nog nie gekom nie”.

21 April 2010