Droogtehulp kom beslis

Daar sal beslis nog 'n paar miljoen rand beskikbaar gestel word vir droogtehulp en in die lig van die huidige klimaatvooruitsigte sal dit waarskynlik nie die laaste keer wees dat die Kabinet om hulp genader word nie, sê mnr. Louis Buys, hoofdirekteur van rampbestuur.

"Dit sal onder die Kabinet se aandag gebring word dat die probleem nie van korte duur is nie." Die memorandum oor die landwye droogteopname word vandeesweek aan die Kabinet op 'n bosberaad voorgelê.

Die Kabinet sal ook gewys word op die belangrikheid dat besteding doeltreffend gemonitor word om te verseker dat die geld gebruik word waarvoor dit bedoel is.

Wat die landbou betref, word gekyk na watervoorsiening vir besproeiing en die moontlike subsidiëring van salarisse of voedselhulp in gevalle waar plaaswerkers gevaar staan om hul werk weens die ramptoestande te verloor, sê Buys.

'n Groot deel van die meer as R200 miljoen wat vroeër beskikbaar gestel is, is gebruik vir hoofsaaklik voerbystand en die herstel van ou en die sink van nuwe boorgate.

23 Januarie 2004