Dubbele moord ruk Soutpansberg

‘n Bejaarde egpaar is op hul plaas naby Vivo in die Soutpansberg vermoor.

Die voorsitter van die Soutpansberg Distrik Landbouinie, mnr. Stephen Hoffman, het met skok en woede gereageer ná die tweede dubbel plaasmoord binne twee weke in die Soutpansberg distrik. Die Van der Lith egpaar se lyke is gister (Dinsdag) op hul plaas 3 km buite Vivo op die Schiermonikoog-pad, waar hulle met lusern en beeste geboer het op die plaas Swartklip, gevind.

Mnr. Japie van der Goot, voorsitter van die Bobrak Boerevereniging het gesê dat dit wil voorkom asof beide bejaardes wreed - tot die dood toe - gemartel is. Mev. Henna van der Lith se lyk is in die huis ontdek waar sy vermoor is terwyl sy besig was om frikkadelle te maak.

Die lyk van mnr. Blom van der Lith is 800 meter van die opstal by ‘n pomp aangetref. Die liggaam van ‘n plaaswerker, wat vermoedelik deel van die aanvallers was, is ook by die woning gevind. Van der Goot het gesê dat dit wil voorkom asof daar ‘n konfrontasie tussen die werkgewer en werknemers kon gewees het, aangesien daar berigte was van probleme met die verkope van lusern.

Van der Goot het sekere lede van die Mara-polisiestasie, die spesialis SAPD-eenheid en lede van die Plaaswag bedank vir hulle samewerking en vinnig optrede.

Hoffman sê intussen dat daar geen verskoning meer is vir landbouers en grondeienaars om buite die beskermde kring van georganiseerde landbou te staan nie. Hy het alle landbouers en grondeienaars uitgenooi om so gou moontlik by die georganiseerde landbou aan te sluit en deel te word van die kring van beskerming. Hy sê hoe meer mense betrokke is, hoe groter sal die beskermingsnet wees wat oor ‘n gebied gespan kan word.

17 November 2010