Duisende wapens ingehandig

Nog tyd vir herlisensiëring en ’n verdere amnestie-tydperk om onwettige vuurwapens in te handig, is nodig, sê mnr. Pieter Groenewald, Vryheidsfront Plus-woordvoerder vir veiligheid en sekuriteit.

Altesame 125 716 wettige vuurwapens is sedert die in werking treding van die Wet op die Beheer van Vuurwapens in 2004 tot einde Desember 2008 aan die Suid-Afrikaanse Polisiediens (SAPD) oorhandig om vernietig te word.

Die SAPD het sedertdien tot einde Junie 2009 beslag gelê op 104 880 onwettige vuurwapens. In antwoord op skriftelike vrae van die VF Plus in die Parlement, het mnr. Nathi Mthethwa, Minister van Veiligheid en Sekuriteit, gesê 33 829 van die onwettige vuurwapens is gedurende die amnestie-tyd van 1 Januarie tot 30 Junie 2005 aan die polisie oorhandig.

Die VF Plus meen daar kan van meer onwettige wapens ontslae geraak word as mense dit vrywillig indien onder beskerming van amnestie. Groenewald sê dit blyk duidelik uit die syfers dat die registrasieproses vir vuurwapens in terme van die nuwe wet ernstige probleme ondervind en verdere herregistrasie toegelaat sal moet word.

“Uit vorige antwoorde van die minister was daar tot Februarie vanjaar 881 136 aansoeke vir herlisensiëring. As die ingehandigde wapens bygetel word, is dit net meer as 1 miljoen. As in ag geneem word dat daar ongeveer 4 miljoen wettige vuurwapens in die land is, beteken dit daar is nog 3 miljoen aansoeke vir herlisensiëring uitstaande waarvoor nog tyd nodig is. Die VF Plus is reeds in gesprek met die Minister daaroor,” sê Groenewald.

12 Augustus 2009