Duurder brandstof ‘katastrofies’

Die styging in die brandstofheffing van meer as 25 sent per liter in die Begroting is met skok deur die TLU SA begroet.

Die Minister van Finansies, mnr. Pravin Gordhan, het in sy eerste Begrotingsrede aangekondig dat belasting op brandstof met 25,5 sent ‘n liter sal opgaan.

Dit sluit in die verhoging van die die belastingheffing op petrol en diesel met 10 sent per liter, ‘n 7,5 sent per liter verhoging om by te dra tot die befondsing van ‘n nuwe petroleumpyplyn tussen Durban en Gauteng en ‘n 8 sent per liter verhoging om by te dra tot die Padongelukkefonds. Die heffings tree op 7 April in werking.

Die TLU SA sê dat hy namens alle boere van die land met skok kennis neem van die styging in brandstofheffing van meer as 25 sent per liter. “Hierdie styging gaan die boere erg slaan, omdat elke vertakking van boerdery brandstof-sensitief is,” sê TLU SA se voorsitter, mnr. Ben Marais.

“Nie net gaan dit die verbruiker hard slaan nie, maar die boer, wat ’n verbruiker is in eie reg, gaan ook getref word omdat die vervoerkoste ook ’n invloed gaan hê op sy kunsmis-, saad- en voerpryse omdat baie daarvan vervoer word.

“Met hierdie brandstofverhoging, en die verwagte verhoging van elektrisiteit, gaan alle ander pryse ook astronomies styg, terwyl die boere steeds in die onbenydenswaardige posisie is dat hulle maar moet aanvaar wat hulle vir hulle pryse kry.

Die landbou het nou op die punt gekom dat hy op die rand van ’n katastrofe huiwer, en tensy daar nie voorsiening vir die boere gemaak gaan word nie, gaan die verhoogde koste lei tot vermindering in voedselproduksie, met alle gevare daaraan verbonde,” sê Marais.

* Hoewel brandstof en sondebelasting verhoog gaan word, het Gordhan, darem ‘n verligting in die persoonlike belasting vir individue van R6,5 miljard toegestaan om vir die gevolge van die inflasie te vergoed.

17 Februarie 2010