'Elkeen vir homself'-sienswyse nie haalbaar

Die oproep om betrokkenheid, eenheid en saamstaan in die landbougeledere word al harder namate frustrasie groei oor die manier waarop die landbou in belangrike sake geïgnoreer word.

Talle sprekers het Agri Noordwes se kongresgangers gemaan oor die onbekostigbare weelde van die uitganspunt "elkeen vir homself".

Mnr. Fanie Bam, voorsitter van Agri Noordwes se derdevlak regeringskomitee, sê in Tswaing is 'n oorkoepelende organisasie van belastingbetalers op die been gebring wat uit onder meer plaaslike landbourade en sakekamers bestaan. Dit stel hom in staat om as een ekonomiese organisasie met die plaaslike owerheid te kommunikeer.

Die hele konsep van grondbelasting gaan plaaslik gehanteer word. Daar gaan uitgevind word of daar sekere vrystellings vir kategorieë gaan wees en teen watter persentasiekoers belasting gehef sal word.

"Teen die tyd dat hierdie proses in Julie volgende jaar 'n werklikheid word, behoort die georganiseerde landbou reeds gereed te wees vir deelname deur plaaslike en/of streekslandbourade. Dit gaan sy gespreksmeganisme wees," sê mnr. Bam.

Dié feit is beaam deur mnr. Ikbal Motala, direkteur-generaal van die provinsiale departement van ontwikkeling en behuising. Hy sê 'n provinsie soos Noordwes, wat hoofsaaklik uit landelike gebiede bestaan, kan nie sonder die landbou klaarkom nie.

Hy het die totstandkoming van 'n sub- of portefeuljekomitee vir die landbou op munisipale en distrikvlak voorgestel sodat "die stem van die landbou gehoor kan word".

Die kongres het hom gewys op die gesukkel om 'n protokol tot stand te bring vir samesprekingsriglyne om bydraes uit die landbou provinsiaal te verseker. "As ons weet ons kan 'n bydrae lewer, sal dit gemoedere kalmeer, maar die finalisering van die protokol sloer reeds 17 maande omdat niemand op provinsiale vlak hom daaraan steur nie."