Ernstige varksiekte tref plaas

Die Wes-Kaapse departement van landbou stel ondersoek in na die uitbreking van vermoedelik blou-oorsiekte (porcine reproductive and respiratory syndrome) op 'n plaas naby Kuilsrivier in die Kaapse metropool.

Tot dusver het toetse die voorkoms van die siekte op een plaas voorlopig bevestig, maar 'n finale bevestiging kan eers gedoen word as die virus wat dit veroorsaak, geïsoleer is. Nóg twee plase is as 'n voorsorgmaatreël onder kwarantyn geplaas. Bloedmonsters van hierdie plase is na Onderstepoort gestuur om die oorsprong en omvang van die siekte te bepaal. Dié plase verskaf teelmateriaal aan die plaas waarop die siekte uitgebreek het.

Dit is die eerste keer dat die siekte in Suid-Afrika voorkom. Dit kom in Europa en Amerika voor en is die eerste keer in 1987 geïdentifiseer.

Mnr. Simon Streicher, hoofbestuurder van die Suid-Afrikaanse Varkprodusente-organisasie, sê dit is die vernaamste varksiekte wat internasionale handel raak. Suid-Afrika het hom tot nou toe daarop geroem dat hy vry van die siekte is.

Kenmerke van die sieke in die vroeë stadium is aborsies en later voortydige geboortes, varkies wat doodgebore word, asemhalingsprobleme en varkies wat swak is. Dr. Gideon Brückner, direkteur van die Wes-Kaapse veeartsenydiens, versoek boere om dadelik hul naaste staatsveearts in te lig as hulle hierdie simptome in 'n buitengewone graad teëkom.

Brückner sê die gevaar is nie groot dat ander plase besmet kan word nie mits boere streng bioveiligheidsmaatreëls toepas en varke net van bronne koop wat 'n hoogstaande gesondheidstatus het.

2 Julie 2004