Eskom beding vir serwitute

’n Paar betrokke boere in Limpopo het daarin geslaag om ’n beter bedeling vir vergoeding aan boere vir serwitute met Eskom te beding. Eskom het tydens ’n vergadering op 23 November in Limpopo ’n model voorgelê waarvolgens serwitute op dosyne plase uitgekoop gaan word vir krag-, spoor- en pyplyne.

Die model is ontwikkel in samewerking met die Limpopo-omgewingsbeskermingsforum (Leaf). Vergoeding word individueel met elke grondeienaar beding en neem werklike asook toekomstige finansiële verliese, die uitwerking op die boerdery, die uniekheid van die grond en die waarde daarvan in ag. Eskom vergoed ook skade aan infrastruktuur.

In gebiede waar dié model nie toegepas is nie, soos in die Soutpansberg, word aanpassings gemaak. Boere het Eskom by die vergadering daarop gewys dat hy ook inbreuk maak op besproeiingsboere se waterregte en dat dit nêrens op die besprekingsagenda verskyn nie.

Volgens mnr. Ockie van den Berg, hoofingenieur van die Departement van Waterwese, vergoed dié departement boere volgens ’n soortgelyke model as dié van Eskom. Van der Berg het gesê die departement meen watervoorrade sal voldoende wees vir die projekte, hoewel verwagte tekorte uit die Krokodilrivier met water uit die Vaalrivier aangevul sal moet word.

3 Desember 2009