EU-kopknik kan groot maatskappye maak of breek

EU-kopknik kan groot maatskappye maak of breek
As die Europese Unie (EU) Suid-Afrikaanse produkte verwerp omdat dit nie aan sy vereistes voldoen nie, kan dit florerende ondernemings vinnig tot bankrotskap dryf, het dr. Francois de Wet, hoofbestuurder van die volstruisabattoir Mosstrich, by Mosselbaai, gesê.

Hy het gesê die nuutste neiging van die EU is om nie net nougeset te let op prosedures in abattoirs nie, maar ook op die bestuur van 'n onderneming om te sien of hy alle bepalings nakom. Die doel is om vleisinspeksies meer wetenskaplik aan te pak en HACCP-aanvaarbaar te maak.
Die waarheid is egter dat Suid-Afrika tans nie aan EU-vereistes voldoen wat abattoirs betref nie. "Die uitdaging lê daarin om dit so vinnig moontlik reg te kry. As dit tog reggekry word, lê daar fantastiese vooruitsigte vir vleisuitvoer vir Suid-Afrika voor," het dr. De Wet gesê.

Mnr. Manie Booysen, hoofbestuurder van SAMIC, het gesê die EU sit lande in sekere kategorieë ten opsigte van malbeessiekte (BSE) en as 'n land hom in die "verkeerde" kategorie bevind, kan dit uiters nadelige gevolge vir só 'n land se uitvoermoontlikhede na die EU inhou. Bepalings oor BSE word gedurig aangepas en strenger gemaak.

Hy meen 'n middeweg sal met die EU onderhandel moet word waarin aan lidlande gewys word dat Suid-Afrika sy bes doen om aan dié vereistes te voldoen, maar deur sekere Derdewêreldse faktore beperk word.

'n Gunstige aspek is dat daar na streekbeheer gekyk word ten opsigte van bek-en-klou-seer. Dit sal beteken dat as die siekte in 'n deel van Suid-Afrika uitbreek, die hele land nie meer noodwendig onder kwarantyn geplaas hoef te word nie.

30 Mei 2003