EU staan vas oor subsidies

Die Europese Unie (EU) verseg om verder te torring aan subsidies vir sy boere en meen ontwikkelende lande moet nou die volgende tree in onderhandelinge neem.

Volgens 'n woordvoerder van die afvaardiging van die Europese Kommissie na Suid-Afrika, het die EU nou sover gegaan as wat hy in dié stadium kan met voorstelle om doeanebelasting met 36 %, uitvoersubsidies met 45 % en hulp met 55 % te verlaag. "Die EU kan nie aanhou met toegewings as hy nie daarvoor erkenning kry nie."

Suid-Afrika en ander ontwikkelende lande sien die toegewings nie as deurslaggewend nie en meen onderhandelinge kan nie vorder alvorens die EU en ander ontwikkelde lande nie bereid is om "werklike veranderinge" ten opsigte van landbousteun en -beskerming te maak nie.

Hoewel aanvaar word dat "subsidies wat die handel verwring" moet waai, het die EU beklemtoon dat hy nie sal ophou om boere te subsidieer met wat genoem word "landelike ondersteuning" nie.

"Landbou-ondersteuning is gemik op die beskerming van Europa se landelike omgewing om verstedeliking te keer," aldus die woordvoerder.

Die getal boere in die EU sal na verwagting met 56 % (7 miljoen boere) toeneem met die EU se uitbreiding aanstaande jaar. Die totale bedrag aan landbousubsidies sal egter nie verander nie, in teenstelling met Amerika wat sy landboubesteding met 70 % verhoog.

Dié standpunte maak dit onwaarskynlik dat die dooie punt in die Doha-onderhandelinge voor die vyfde vergadering van die Wêreldhandelsorganisasie in Mexiko opgelos sal word.