Forum vir wynmakers kom

'n Loodsgroep vir 'n Wynmakersforum is op Stellenbosch gestig om beter koördinasie van seminare en -onderwerpe daar te stel, navorsingsbehoeftes deur te gee, en om skakeling met alle wynmakers te bewerkstellig - ongeag waar hulle opleiding ontvang het.

Mnr. Willem Loots van Kleine Zalze-landgoed buite Stellenbosch en lid van die loodskomitee, sê Bowwus- en Ekovlede - dit is oud-B.Sc.-studente in Wingerd en Wynbou van die Universiteit van Stellenbosch en die Elsenburg-oudstudente in Keldertegnologie - sal as outomaties lede word van die SA Wingerd- en Wynkundevereniging, wat as die koördinerende administratiewe liggaam optree.

Hy sê verskeie forums bestaan in die bedryf, soos die Wingerdkunde-, Tafeldruif-, Navorsings- en verskillende kwekersforums.

Uit die voorlopige loodskomitee, wat tydens 'n na-parswerksessie op Stellenbosch gestig is, sal 'n Wynmakersforum verkies word. Die voorlopige komitee bestaan uit mnre. Bruce Jacks van Kaapstad, Willem Loots van Stellenbosch, Bernardt Veller van Durbanville, Koos Jordaan van Franschhoek, Francois Naudé van Stellenbosch, Neil Ellis van Stellenbosch, Eugene van Zyl van die Paarl, Adelé Louw van Stellenbosch, Charles Hopkins van Franschhoek, Mike Ratcliff en Inus Muller, albei van Stellenbosch.

Mnr. Loots sê 'n datum waarop die forum amptelik gestig sal word, sal vandeesmaand vasgestel word.