Franse boere betoog

Die wêreldwye ekonomiese krisis vat nou ook aan Franse boere se sakke en honderde boere het in Parys en ander groot stede, soos Toulouse en Poitiers, teen dalende kospryse en stygende skuld betoog. Sowat 150 boere het op die Champs-Elysées in Parys saamgetrek, bale strooi en bande aan die brand gesteek en die verkeer ontwrig, lui ’n berig van Al Jazeera.

Volgens Frankryk se grootste landbou-organisasie, FNSEA, het sowat 50 000 mense met 7 000 trekkers landwyd aan die betoging deelgeneem. In Toulouse het boere ook die verkeer ontwrig en in die strate van Poitiers is kleinvee losgelaat. Die boere meen die Franse regering moet aan die landbou dieselfde geldelike hulp gee wat aan die motor- en bankbedryf verleen is.

Die land se minister van landbou, mnr. Bruno Le Maire, sê hy sal ’n beroep op pres. Nicolas Sarkozy doen om boere se belastinglas vanjaar te verlig, luidens ’n berig op Times Online. Die boere eis ook €1 miljard se lenings waarop die regering rente en diensgeld moet betaal. Die landbou is tradisioneel die mees beskermde sektor in die Europese Unie, maar is nie onaangeraak gelaat deur die ekonomiese krisis nie.

Bron:
Al Jazeera
Times Online

19 Oktober 2009