Gauteng-water erg besoedel

Inwoners van die Mafube- en Dihlabeng-munisipaliteit in die Oos-Vrystaat is bekommerd oor beweerde rioolstortings in riviere wat water aan Gauteng voorsien.

Mnr. Danie Eichstädt, voorsitter van die Dihlabeng-inwonersvereniging, sê hulle is veral bekommerd oor riool wat vanaf Paul Roux, Clarens, Bethlehem en Fouriesburg in die Liebenbergsvleirivier beland. Die Liebenbergsvleirivier is een van die hoofare van die Asrivier, wat water vanaf die Katzedam in Lesotho na Gauteng lei.

Eichstädt sê onlangse toetse van die water op Paul Roux het aangedui dat die telling van skadelike organismes in dié water 1 300 per 10 ml is, terwyl die norm 100 per 10 ml is. Hy sê daar is ook ’n hoë telling van skadelike organismes in Clarens se water gekry.

Toetse wat op Bethlehem en Fouriesburg se water gedoen is, dui aan dat die dorpe se watersuiwerheid aan nasionale standaarde voldoen. “Rioolwater van Bohlokong buite Bethlehem loop egter onder die Sol Plaatjie dam in die Liebenbergsvleirivier in.”

Die vereniging het sowat twee maande gelede die Dihlabeng-munisipaliteit gevra om ’n oudit op al hulle rioolpompstasies te laat doen om vas te stel of alles in orde is. Eichstädt sê hulle het nog geen terugvoer daaroor vanaf die munisipaliteit gekry nie.  “Ons wil net die besoedeling voorkom van die water wat van ons af na Gauteng gelei word.”

Blou Skerpioene ondersoek
Intussen is die inwoners van die Mafube-munisipaliteit ook ontevrede omdat rioolwater van Frankfort en Villiers, ondanks ’n hofbevel daarteen, glo steeds in die Vaal- en Wilgerivier ingepomp word.

Mnr. Pieter van der Westhuizen, voorsitter van die Mafube-aksiegroep, sê die hof het die afgelope jaar bevind dat die munisipaliteit alle stortings in die riviere moet staak, maar daar is teen die uitspraak geappelleer en die storting gaan glo steeds voort. 

“Die Blou Skerpioene het vanjaar ook die saak ondersoek. Mnr. Dirk den Boon, ’n forensiese kundige, het bevind dat daar 29 000 skadelike organismes per 1 000 ml in Villiers se water voorkom, terwyl die aanvaarde aantal skadelike organismes 450 per 1 000 ml mag wees”.

Van der Westhuizen sê hy is van plan om volgende jaar ’n onafhanklike ingenieur aan te stel om te kyk of die dorpe se rioolstelsels aangepas word by die residensiële uitbreidings wat die munisipaliteit toelaat.

Landbou.com het nog geen terugvoering oor navrae by die munisipaliteite ontvang nie.

17 Desember 2009