‘Gebrekkige navorsing gaan land inhaal’

Suid-Afrika belê heelwat minder in landbounavorsing en -ontwikkeling en gaan oor ’n dekade die vrot vrugte daarvan pluk, meen prof. Herman van Schalkwyk, rektor van die Universiteit van die Noordwes se Potchefstroomkampus.

Hy het op ’n gesamentlike kongres van die verenigings vir gewasproduksie, grondkunde, onkruidwetenskap en tuinbou gesê minder navorsing sal uiteindelik beteken dat die land ’n laer opbrengs toon as ander lande wat in navorsing belê het.

“Universiteite lewer steeds ’n tersaaklike bydrae, maar die land bied nie genoeg praktiese opleiding aan boere nie,” het Van Schalkwyk gesê. Hy het verwys na die kapasiteitsprobleme by landboukolleges.

Van Schalkwyk sê dié probleem kort dringend aandag. “Ons werk tans steeds in silo’s wanneer dit kom by navorsing. Dit is ’n luuksheid wat ons nie meer kan bekostig as ons maatskaplike voorspoed en ’n vooruitstrewende omgewing wil skep nie.”

Van Schalkwyk sê navorsing verhoog nie net ’n land se produktiwiteit nie, maar dit verhoog ook die vlak waarop belanghebbendes hul kundigheid deel.

30 Januarie 2012