'Geen plek vir politieke retoriek in landbou'

Die grootste uitdaging vir die georganiseerde landbou is om die Regering te wys op dwalinge in die landboubeleid en die beperkings wat in 'n hoogs mededigende omgewing op landbouproduksie geplaas word. Retoriek of politieke drome het nie 'n plek in die landbou nie.

Die georganiseerde landbou is nie die politieke teenstander van die Regering en ook nie vyande van die land nie, het mnr. Hoffie Joubert, uittredende voorsitter van die Oranjerivier-landbou-unie, op dié unie se kongres in Upington gesê.

Onderlinge vertroue, saam met 'n duidelike begrip dat historiese antagonisme tot niemand se voordeel is nie, is in Suid-Arika nodig. Elke keer as krete uit blanke geledere opgaan oor die gebeure in Zimbabwe, beleef miljoene swart mense dit as die wit mense van Suid-Afrika se vasbeslotenheid om alles vir hulself te hou.

Hy het gesê die georganiseerde landbou beskou grondhervorming, wat hoog deur die Regering aangeslaan word, as 'n voorkeursaak. Die vestiging van nuwe boere is 'n werklikheid wat nie weggewens kan word nie en wat in die praktyk moet slaag.

"Suksesse is bereik, maar ongelukkig is die vestiging van nuwe boere niks anders nie as 'n grootskaalse katastrofe. Die rede is dat té veel mense en té groot groepe op onekonomiese eenhede gevestig word." Volgens hom is inviduele eienaarskap en die gepaardgaande verantwoordelikheid in die meeste gevalle nie ter sprake nie.

Daar is verskeie kere probeer om nuwe boere by organisasies te betrek, maar dit is vir organisasies geldelik onmoontlik om 'n diens aan die nuwe boere te lewer. Maniere sal gevind moet word om geld van die Regering te kry sodat nuwe boere in strukture opgelei en gehuisves kan word.

Grondhervorming kan ook nie werkloosheid verminder nie. Die vestiging van opkomende boere kan net slaag as dit met die vestiging van 'n sterk infrastruktuur en 'n program vir landelike ontwikkeling gepaard gaan.

Mnr. Joubert het 'n beroep op boere gedoen om georganiseerde strukture in die landbou te ondersteun. "Tans is dit al waarheen ons ons toevlug kan neem. Dit is bekend dat Agri SA geldelike probleme het. Ons kan nie toelaat dat ons strukture eers in duie stort en dit dan daarna weer probeer opbou nie."