Geveg oor minerale duur voort

Die Regering het nóg ’n bloutjie geloop in die sage oor die onteiening van minerale regte.

Die Grondwethof het sy aansoek afgekeur vir direkte toegang tot dié hof oor die bevinding dat hy boere van hul minerale regte onteien het en daarvoor moet vergoed.

Die Departement van Minerale Hulpbronne moet nou eers na die Appèlhof appelleer voor hy weer die Grondwethof oor die saak kan nader.

Staat wend hom tot Grondwethof
Die staat het direkte toegang tot die Grondwethof versoek oor die uitspraak in die Noord-Gautengse Hooggeregshof in April in die saak tussen Agri SA en die Minister van Minerale Hulpbronne.

Die regter het bevind dat die staat boere van hul minerale regte onteien het met die Wet op die Ontwikkeling van Minerale en Petroleumhulpbronne.

Appèl aangehoor
Regter Ben du Plessis sal nou eers die aansoek om appèl moet aanhoor en verlof toestaan waarna die Appèlhof oor die feitelike dispute sal moet beslis.

Eers dan kan die Grondwethof weer na die saak kyk. Die staat het reeds meer as R1 miljoen van die publiek se geld aan die saak bestee en dit kan aansienlik vermeerder.

Agri SA het terselfdertyd appèl aangeteken by die Hooggeregshof oor die vergoedingsbedrag wat die hof in die saak toegestaan het en wat nie op markwaarde bereken is nie.

10 Junie 2011