Goeie re

Goeie reën het die afgelope twee weke oor bykans die hele mieliegebied voorgekom en dit word in die daling in pryse weerspieël.

Mnr. Johan van den Berg van Enviro Vision sê dit wil voorkom of die hele Vrystaat en Noordwes in die derde week van Februarie ten minste 20 mm en Mpumalanga en KwaZulu-Natal ten minste 40 mm tot 100 mm gekry het.

Op kort termyn lyk toestande gunstig vir veral die oostelike dele van die mieliegebied, maar die sentrale en westelike dele kan ook verspreide buie verwag.

Op langer termyn lyk toestande gunstig om ten minste normale reën te kry. Normale reën in Maart en April wissel van 100 mm tot 150 mm oor die grootste deel van die mieliegebied.

Hy sê toestande is gunstig vir kopvrot met die groot mate van droogtestremming wat ervaar is, klein ligte koppe wat nie maklik ondertoe gaan hang nie en maklik kan natreën, sowel as die verwagte gunstiger toestande vir reën. Stamruspe is 'n probleem by mielies wat laat geplant is.

Oor pryse sê mnr. Hennie de Lange, besturende direkteur van Unigrain, die reën van die afgelope tyd is verdiskonteer in die daling in die mark. Daar is egter baie onstuimigheid en pryse beweeg maklik met tot R60 op en af per dag. Hy sê dit wys dat daar baie onsekerhede is, soos die reënverwagtinge vorentoe, die werklike grootte van die oes en die internasionale prentjie.

Hy sê voor die reën, sowat 'n maand gelede, het witmieliepryse 'n hoogtepunt van R1 580/ton behaal en die middel van verlede week tot R1 215/ton gedaal.