Grond: Amptenare op vingers getik

Junior amptenare mag voortaan nie oor grondtransaksies namens Departement van Landelike Ontwikkeling en Grondhervorming onderhandel nie.

Die Parlement se staande komitee op begrotings het die departement geroskam omdat die Regering R12 miljard skuld weens junior amptenare se toedoen.

Volgens mnr. Sibusiso Gamede, waarnemende hoofgrondeisekommissaris, het die departement getekende aanbiedinge aan grondeienaars vir hul grond en artikel 42-aktes wat gesamentlik R7,5 miljard beloop. Gamede sê die R7,5 miljard het tot R12 miljard gestyg weens die hofsake teen die departement.

’n Artikel 42-akte is ’n deel van die Wet op die Herstel van Grondregte wat die minister of die grondeisekommissaris die mag gee om eise vir restitusie goed te keur.

Nog 4 000 eise uitstaande
Gamede het lede van die komitee ontstel toe hy gesê het dat daar nog sowat 4 000 eise is wat nog nagevors word voor dit gewaardeer kan word. “Ons wil binne die volgende drie jaar alle uitstaande eise finaliseer.”

Howe het die departement al telkemale gelas om vir die grond te betaal − selfs al was daar net ’n aanvaarde aanbieding en nie net die beklinking van die transaksie nie. Heelwat grondeienaars het die departement ook al hof toe gesleep.

Die departement het tot dusver R700 miljoen aan hofaansoeke betaal.

“Almal haas hulle na die hof, want hulle kan die departement dwing om te betaal,” het Gamede gesê. Die departement werk nou aan ’n strategie om met boere te kommunikeer.

Hy het verder aangedui dat slegs die provinsiale grondeisekommissarise by magte is om oor grond te onderhandel. Hy het ook aangedui dat daar ook eise is wat verkeerdelik in die Staatskoerant gepubliseer is wat van die lys afgehaal moet word.

16 Augustus 2010