'Grond sal gekoop word'

Grondaankope deur die staat sal volgens die gewillige koper, gewillige verkoper benadering behartig word, sê me. Tina Joemat-Pettersson, Minister van Landbou, Bosbou en Visserye. Kommersiële plase sal nie na willekeur onteien word nie.

"Dié versekering sal as 'n welkome ligpunt in onseker tye deur die hele boeregemeenskap ervaar word," sê mnr. Werner Weber, die Vryheidsfront Plus (VF Plus) se woordvoerder vir landbou en grondsake.

Volgens Weber is die VF Plus wel bekommerd oor 'n paar kwessies:

•  Die VF Plus is van mening dat meer as net die beweerde 4% van Suid-Afrika se grond aan opkomende boere oorgedra is.
•  Voedselvoorsiening en selfvoorsiening van voedsel sal in gedrang kom as die Regering hul doelwit van 30% grond oorgedra bereik deur die aankoop van grond in die oostelike groen gordelgebied.
•  Baie grond word sonder goeie rede geëis. Boere bied hul grond dan, onder druk, aan die staat.

Weber meen om 'n billike en regverdige bedeling van grondbesit in Suid-Afrika te bewerkstellig, moet die minister die vestigingsgeskiedenis van plase in Suid-Afrika bestudeer.

18 Junie 2009