Groot afwagting vir begroting

Boere in die Oos-Kaap gaan met groot afwagting na mnr. Pravin Gordhan, Minister van Finansies se begrotingsrede luister omdat dié provinsie grootskaalse ramphulp benodig. Mnr. Cerneels Pietersen, voorsitter van Agri Oos-Kaap, sê baie boere benodig ramphulp aangesien natuurrampe die provinsie al sedert 2007 teister.

“In 2007 was dit die erge oorstromings, daarna loop ons deur onder die versmorende droogte en verlede week het groot dele van die Langkloof onder brande deurgeloop,” verduidelik hy.

Hy sê sedert 12 Januarie vanjaar het die provinsiale departement van landbou reeds R18 miljoen se droogtehulp aan boere uitbetaal. Die bedrag is egter baie minder as die R101 miljoen waarvoor aanvanklik gevra is, en die R26,9 miljoen wat later belowe is.

Meer fondse vir ramphulp
Pietersen sê daar is hoop dat Gordhan meer ramphulpfondse aan die land beskikbaar sal stel. “Ons hoop vir ‘n aansienlike hoër syfer vir ramphulp. Dit sal bepaal of die verdere R51 miljoen waarvoor ons in die nuwe boekjaar aansoek gedoen het, aanvaar sal word,” vertel Pietersen.

Van die sowat 6 700 boere in die provinsie wat vir droogtehulp aansoek gedoen het, is subsidies slegs aan sowat 400 kommersiële boere en 2 200 opkomende boere toegestaan.

Skade na brande
Intussen staan die koste van skade na verwoestende brande in die Langkloof-omgewing tans op R20 miljoen. Pietersen sê opnames word steeds gedoen en  die finale bedrag sal na verwagting veel meer wees.

Mnr. Andre de Witt, voorsitter van die Langkloof-boerevereniging, sê sowat 20 ha vrugteboorde en 55 ha denneplantasies het afgebrand. “Daar is niks wat op daai grond agtergebly het nie, die bome, die vrugte en die besproeiingstelsels het gebrand. Die vuur het deur die hele Langkloof gebied beweeg en alles afgebrand wat kon brand,”sê hy.

Gordhan sal vandag (17 Februarie) om 14:00 sy tweede begrotingsrede in die Parlement lewer.

17 Februarie 2010