Groter beleggings in landbou nodig

Die Wêreldnatuurfonds (WWF) glo om armoede op die platteland te verminder en bioverskeidenheid te help bewaar, moet meer geld aan die ondersteuning van volhoubare landbou in ontwikkelende lande gegee word.

Mnr. David Reed, direkteur van die WWF se kantoor vir makro-ekonomiese programme, sê inisiatiewe moet nie soos in die verlede op groei fokus nie, maar ook die omgewing in ag neem.

'n Onlangse studie wat deur die WWF gefinansier is, het bevind die landbou is die vernaamste bron van lewensmiddele vir arm mense op die platteland, maar ook die grootste oorsaak van die verlies van habitat en bioverskeidenheid. Tog het ontwikkelingsagentskappe soos die Wêreldbank se ondersteuning vir volhoubare landbou sedert die middel van die 1980's in reële terme skerp gedaal.

Volgens die studie is daar 'n behoefte om beleggings te fokus op die verbouing van meer en beter gewasse in gebiede wat beter daaraan toe is en 'n hoër bevolkingsdigtheid het om ekonomiese groei aan te moedig en armoede te verlig. Behoorlike beplanning is nodig, omdat van die rykste bioverskeidenheid in hierdie gebiede voorkom.

In marginale gebiede met 'n lae bevolkingsdigtheid moet lande eerder op onderwys konsentreer en die bewaring van bioverskeidenheid gebruik om inkomste vir die plaaslike bevolking te genereer. Beleggings hier moet selektiewe landbou-intensifisering ondersteun en die plaaslike bevolking se beheer oor en bestuur van hulpbronne vir bewaring help verbeter. Dit is noodsaaklik om die plaaslike bevolking se deelname te bevorder.

Mnr. Jason Clay, waarnemende vise-president van die WWF se Sentrum vir Bewaringsinnovering, sê ontwikkelde lande kan ook 'n baie groot verskil maak deur van die geld wat hulle tans aan landbousubsidies bestee, eerder aan die bevordering van volhoubare landboupraktyke wêreldwyd toe te deel.