Handelaars steun ondersoek

Die kleinhandelaars wat nou deur die Mededingingskommissie vir prysknoeiery ondersoek word, verwelkom dié ondersoek en bied hul volle samewerking aan.

“Ons verwelkom enige ondersoek of navrae en sal met die kommissie saamwerk. Ons rekord as ‘n mededinger wat koersvas teen anti-mededingende bedrywighede, prysknoeiery en sameswering staan, is sterk,” sê mnr. Nick Badminton, hoof uitvoerende beampte van Pick n Pay.

Spar sê hy “het niks om weg te steek nie”. Dié groep se bemarkingshoof, mnr. Roelf Venter, sê “die kleinhandel is die mededingendste sektor in Suid-Afrika, so laat die kommissie dié feit vir eens en altyd op die tafel kry. Spar sit nie in besprekings om tafels met ander kleinhandelaars nie”.

Shoprite-Checkers hou vol hy is aan die verbruiker se kant. “Ek het reeds vier weke gelede gesê dat die Shoprite-groep ‘n ondersoek rakende dié kwessie verwelkom,” sê mnr. Whitey Basson, hoof uitvoerende beampte.

Woolworths sal ook met die kommissie saamwerk. Massmart se hoof finansiële beampte, mnr. Guy Hayward, sê sy maatskappy is gelukkig dat daar ‘n formele ondersoek gaan wees.

Bron:
Fin24.com

30 Junie 2009