'Help klimaat, belê in landbou'

Belegging in die modernisering van die landbou is nodig om die ongunstige impak van klimaatsverandering in dié sektor teë te werk, sê Agri SA. Die Parlement het openbare verhore gehou oor onder meer die politieke, ekonomiese en maatskaplike impak van  klimaatsverandering.

Agri SA het in sy voorlegging gesê dat boere die vermoë het om by klimaatsverandering aan te pas. Hulle beperk dit deur volhoubare landboupraktyke toe te pas wat kweekhuisgasse verminder.

Die bedryf word gereeld slegs as die “uitlaat”-sektor gesien wat verantwoordelik is vir 14% van die totale vrystelling van gasse. Wêreldwyd probeer boere ’n meer gebalanseerde siening tuisbring.

Die verwydering van kweekhuisgasse deur die landbou is heelwat meer as die vrystelling van dié gasse deur die bedryf. Altesame 70 % van die beperkingspotensiaal kan deur ontwikkelende lande bewerkstellig word. Dié potensiaal moet as ’n vinnige en kostedoeltreffende manier vir die beperking van kweekhuisgasse gesien word, sê die organisasie.

Lees meer in Landbouweekblad se uitgawe van 27 November 2009.

20 November 2009