Hervorming: ‘Boere moet moue oprol’

Om grondhervorming en die landbousektor vir toekomstige geslagte suksesvol te maak, moet “boere hulle moue oprol en self dinge beter maak”, sê Agri SA.

Dr. Theo de Jager, ondervoorsitter, meen elke boer in die land moet deel in die verantwoordelikheid van suksesvolle grondhervorming. Hy was een van die sprekers by die Melkprodusente-organisasie se jaarkongres in Johannesburg.

“Die kans vir grondhervorming om suksesvol te wees, as dit net van die staat afhang, is niks. Ek dink elke boer in die land skuld die land dit om ten minste een swart boer te help. Dié is die uitdaging van ons geslag. Dit is so geldig en gewigtig soos die boere-oorlog vir vorige geslagte was,” sê De Jager.

Verskeie bedrywe se toekoms is in gedrang 
Volgens De Jager kan die mislukking van grondhervorming die einde van verskeie bedrywe beteken. “Die koffie- en teebedryf bestaan omtrent nie meer nie weens mislukte grondhervorming. Die piesangbedryf se toekoms is tans in gedrang. Ek voorspel dat die avokadobedryf teen 2014 dieselfde probleme kan beleef, en so ook die makadamiabedryf teen 2016. Die mangobedryf word ook bedreig.”

Die bedryf wat tans die meeste getransformeer is, is suiker. Die hoenderbedryf is ‘n ander gunsteling onder begunstigdes. De Jager meen egter die melkbedryf is die mees ongewilde, want dit verg die sterkste bestuursinsette en langste ure.

“Dit maak die uitdagings vir dié bedryf groter as by ander.”

Groenskrif? 
De Jager voorspel dat die Groenskrif oor grondbeleid vóór die ANC se jaarkongres op 19 September begin, in die Parlement ter tafel gelê sal word.

Hy sê hoewel hy brand om die inhoud van die dokument te sien, glo hy dit is al twee keer aangepas.

“Ons het al twee keer met mnr. Gugile Nkwinti, Minister van Landelike Ontwikkeling en Grondhervorming, vergader om die dokument te bespreek. Ons het onder meer die praktiese implikasies rakende grondplafonne aan hom verduidelik, waarna hy sy span aangesê het om dit te hersien.”

25 Augustus 2010