Hervorming: 'Verwarring help nie'

Die Vryheidsfront Plus (VF Plus) sê hy verwelkom pres. Jacob Zuma se herbevestiging dat geen grondonteienings soortgelyk aan die grondgrype in Zimbabwe, in Suid-Afrika sal voorkom nie, maar sê die ANC se uiteenlopende uitsprake oor grondhervorming het groot onsekerheid in die landbousektor tot gevolg.

ANC Jeugliga steun Zuma se stellings
Die ANC Jeugliga het ook bekend gemaak dat hy die stellings wat Zuma gedurende 'n grondwetlike simposium gemaak het, ten volle ondersteun.

"Daadwerklike veranderinge sal aan die beginsel van vrywillige koper en vrywilliger verkoper gemaak moet word," het Zuma luidens 'n berig op News24.com gesê. Volgens Zuma word praktiese oplossings tans ondersoek, maar hy sê die proses sal binne die grense van die wet geskied.

Die verwarring?
Die VF Plus sê die verwarring wat geskep is deur die afgelope maande se uitsprake oor nasionalisering en grondhervorming, is vererger deur die Jeugliga se ondersteuning vir Zuma se uitsprake.

"Die ANC Jeugliga se onlangse uitsprake oor die nasionalisering van grond en hul bewondering vir Zimbabwe se mislukte grondhervormingsbeleid, het heftige reaksie in Suid-Afrika uitgelok. Sluit die "praktiese nuwe formule" wat die president voorstel vir grondhervorming, ook die ANC Jeugliga se voorstelle in of nie?" vra die organisasie.

Die party sê hy hoop dat die Jeugliga sal kennis neem van die verval wat in Zimbabwe voorgekom het weens die land se grondhervormingsmodel. Volgens die verklaring het werkloosheid in Zimbabwe, sedert dié land met sy grondonteieningsbeleid begin het, van 20% na 85% toegeneem, en die lewensverwagting het van 60 jaar na 34 jaar gedaal.

Grondhervorming 'n saamgestelde skildery
Intussen beskryf die Demokratiese Alliansie (DA) Suid-Afrika se grondhervormingsproses as 'n skildery waarop baie persone spatsels laat sonder om te weet wat hulle presies wil verf. Volgens die DA kom dié besluiteloosheid die land, asook dié persone wat nie grond besit nie maar graag wil, duur te staan.

"Dit is totaal onnodig. Ons Grondwet lê duidelike riglyne vir grondhervorming uit, en al wat die ANC moet doen is om die kolletjies op die skildery te verbind en die figure in te kleur. Eenvoudig."

Die DA sê die uitsprake wat tans oor nasionalisering gemaak word, asook die algemene besluite wat die Regering maak is 'n resep vir mislukking. "Die ANC moet na die basiese besluite terugkeer."

 1 Mei 2010