HUB’s buitensporig vergoed?

Ná ‘n onlangse studie wat Computus, forensiese en finansiële rekenmeesters, oor die vergoeding van hoof uitvoerende beamptes (HUB’s) in Suid-Afrika gedoen het, sê dr. Philip Theunissen, kundige van die maatskappy, “die resultaat is dat HUB-vergoeding in Suid-Afrika volgens alle aanduidings wel buite beheer is”.

Vir die studie het Computus die inligting van 326 maatskappye wat op die Johannesburgse Effektebeurs (JSE) genoteer is, vir die finansiële jaar van Julie 2008 tot Junie 2009, gebruik. Daarvolgens verdien HUB’s gemiddeld twee keer soveel soos die staaspresident terwyl hulle jaarliks drie keer meer as Kabinetsministers verdien.

“Die gemiddelde vergoeding van die HUB’s van al die betrokke maatskappye het R4,76 miljoen per jaar beloop. Dit is ‘n gemiddelde basiese salaris van R2,37 miljoen per jaar, terwyl die gemiddelde salaristrekker volgens Statistieke SA R124 457.00 oor dieselfde tydperk verdien het,” verduidelik Theunissen.
 
In die landbousektor?
Volgens Theunissen is Afgri die enigste landbou-onderneming wat op die JSE genoteer is. Hy sê toe mnr. Jeff Wright van Afgri in 2008 gevra is om te bedank het hy ‘n totale pakket van R18,2 miljoen verdien. “Daarvan was R6,2 miljoen sy basiese salaris, terwyl hy ‘n bonus van R11 miljoen ontvang het. Die balans was toelaes,” verduidelik hy. Theunissen sê mnr. Chris Venter, huidige HUB van Afgri, het in 2009 R2,3 miljoen ontvang.

Meer inligting is op www.computus.co.za beskikbaar.

Hoe lyk kleinhandelaars?
Theunissen sê die verslag dui aan dat mnr. Wayne Hook, HUB van Spar, se basiese salaris R 1 838 000.00 beloop, terwyl sy totale vergoeding R 4 135 000,00 is. Mnr. Nick Badminton, die HUB van Pick ‘n Pay, se basiese salaris is R 3 030 000,00 en sy totale pakket beloop R 6 822 400,00. Volgens die studie verdien mnr. Whitey Basson, HUB van Shoprite Holdings, ‘n basiese salaris van R19 305 000,00 en ‘n totale vergoeding van R 24 128 000,00.

Onbillike boodskap
Theunissen meen dat die vlakke van HUB-vergoeding tans die verkeerde boodskap oor die billikheid van vergoeding aan die gemiddelde salaristrekker stuur, aangesien HUB’s nie noodwendig weens uitsonderlike prestasies vergoed word nie.

“Dit wil op die ou einde eerder lyk of HUB’s die omstandighede van onvoldoende en oneweredige inligting rondom hulle vermoeëns tot só ‘n mate misbruik dat, wanneer dit by vergoedingsonderhandelings kom, hulle individuele bedinging baie groter as die kollektiewe bedingingsmag van die res van die 8,4 miljoen salaristrekkende werkers is.”

4 Mei 2010