'Ideale' mielie dalk eendag verbou

Dit is dalk nie té vergesog om te voorspel dat 'n mieliekultivar wat aan al die vereistes van die boer, meulenaar én verbruiker voldoen, eendag verbou kan word nie.

Mnr. Tony Godrich, besturende direkteur van Godrich Flour Mills, het op 'n internasionale mielie-boeredag van Omnia op Nampopark, by Bothaville, verduidelik wat alles gedoen word om hierdie kultivar te teel.

Hy het gesê boere wil gewoonlik 'n hoë opbrengs en goeie gehalte mielies produseer om maksimum wins te maak. Die verbruikers wil op hul beurt mieliemeel na hul smaak hê, in die algemeen effens growwe meel, sonder swart deeltjies en die prys moet bekostigbaar wees.

Die meulenaar is die skakel tussen die boer en verbruiker en hy benodig 'n sekere tipe mielie om in die verbruiker se smaak te voorsien, maar met die regte grootte, witheid en hardheid om doeltreffend te kan maal én die regte meel te lewer.

Kultivars met 'n harde, wit mieliekern en eenvormige grootte is dus dié tipe wat die beste meel moontlik maak. Dieselfde kultivars behoort vir boere die hoogste opbrengs te gee. Só 'n kultivar sal dus die boer, meulenaar én verbruiker tevrede stel.

Sommige kultivars voldoen nie hieraan nie, daarom dat die Meulenaarskamer 'n jaar gelede 'n lys met 105 ongewenste graankultivars bekend gemaak het, gebaseer op toetse van die Landbounavorsingsraad (LNR). Die kultivarkomitee stel nou 'n lys van gewenste kultivars saam. Teelprogramme is aan die gang om hierdie kultivars te teel, terwyl die LNR ook toetse oor onder meer hardheid doen.

Die meulenaarsbedryf doen landwyd proewe by meulens om vas te stel of die metode wat die Amerikaners gebruik om hektolitergewig te bepaal, met behulp van die kwartkoppie-toetsapparaat, ook in Suid-Afrika gebruik kan word.

Mnr. Godrich het die Departement van Gesondheid gelukgewens omdat die verryking van mieliemeel in Oktober verpligtend gaan word nadat diepgaande studies die afgelope drie jaar deur belanghebbendes uitgevoer is. Daarvolgens moet meulenaars van 3 Oktober af voedingstowwe by mieliemeel voeg. Die koste van sowat R115 miljoen per jaar, asook die apparaat wat daarvoor nodig is, sal deur die meulenaars aangegaan word, maar die koste sal uiteindelik na die verbruiker oorgedra word.