Instituut vereer vir onkruidnavorsing

Die afdeling vir onkruidnavorsing van die Landbounavorsingsraad se Instituut vir Plantbeskerming, naby Pretoria, is aangewys as die wenner in die kategorie vir korporatiewe organisasies in die vierde jaarlikse toekenning van die Wetenskap- en Tegnologieforum (NSTF).

Volgens dr. Helmuth Zimmermann, hoof van dié afdeling, is die toekenning gemaak vir die navorsing op die biologiese beheer van vreemde indringerplante, sowel as van waterbronne wat natuurlike hulpbronne en die biologiese uiteenlopendheid of biodiversiteit bedreig. ``Dit behels die uitkenning van natuurlike vyande van die teikenonkruid in die plant se land van oorsprong, die studie van die natuurlike vyande en die bepaling van hul gasheerspesifiteit en die uiteindelike loslating in Suid-Afrika van die vyande wat die onkruid beskadig, maar geen gevaar vir inheemse plante of landbougewasse inhou nie. 'n Totaal van 90 biologiese beheeragente is reeds in Suid-Afrika vir die beheer van 47 indringerplantspesies losgelaat,'' het dr. Zimmermann gesê.
Volgens dr. Zimmermann bedek vreemde indringerplante sowat 10 miljoen hektaar in Suid-Afrika. Dit is sowat agt persent van die land se totale oppervlakte. 'n Beraamde sewe persent van die land se jaarlikse afloopwater, of 3,3 miljard kubieke meter, gaan deur die indringing van hierdie plante verlore, gevolglik het 'n groot getal landelike gemeenskappe geen toegang tot drinkwater nie.
Hy het gesê dat die beheer van indringerplante een van die duurste bestuursinsette in die landbou, bosbou en natuurbewaring is en selfs die waarde van grond kan oorskrei. As hierdie besmettings oor 'n tydperk van 20 jaar uitgewis kon word, sou die jaarlikse koste daarvan na beraming R600 miljoen beloop.
Dr. Zimmermann het gesê die afdeling vir onkruidnavorsing word tans in 'n groot mate deur die Regering se Werk-vir-Water-program gefinansier.1 November 2002