Interdik moet Zim-ooreenkoms keer

Indien die Suid-Afrikaanse Regering nie ’n “diskriminerende klousule” uit die bilaterale beleggingsooreenkoms (Bippa) met Zimbabwe verwyder nie, wil Suid-Afrikaanse burgers wat in Zimbabwe boer, die ondertekening Vrydag in Harare met ’n interdik keer.

Dié ooreenkoms sluit “historiese” grondgrype deur die Zimbabwiese regering uit.

’n Forum het vroeër vandag (Woensdag) op ’n vergadering in Centurion deur bemiddeling van Agri SA en die Commercial Farmers Union (CFU) in Zimbabwe tot stand gekom om dié boere se belange te beskerm.

Die georganiseerde landbou is onthuts oor die inhoud van die voorgenome ooreenkoms en sê hy is glad nie nie daarin geken nie. Verskeie vertoë tot die Regering het geen reaksie uitgelok nie. “Ontvangs van briewe is nie eens erken nie,” het mnr. Hans van der Merwe, uitvoerende direkteur van Agri SA, gesê.

Die interdik, wat aanvanklik Vrydag ingedien sou word, is na verneem word op versoek van die SA Regering vervroeg tot Donderdagmiddag 14:00 in die Noord Gautengse Hooggeregshof omdat dit ’n erge verleentheid sou wees as hy reeds in Harare is wanneer dit moontlik toegestaan word.

“Indien die Regering voortgaan met die ondertekening, maak hy ’n groot fout. Dit sal ongrondwetlik wees en indruis teen die Verdrag en Tribunaal van die SAOG en die internasionale reg.

“Mense is nie gekant teen ’n Bippa met Zimbabwe nie, maar is bekommerd oor die inhoud,” sê mnr. Willie Spies, regsverteenwoordiger van AfriForum, wat boere bystaan met die interdik.

Die SA Regering se standpunt oor boere wat hul plase verloor het, is dat dit “’n saak tussen hulle en die Zimbabwiese regering” is.

25 November 2009