Internasionale bokkongres in SA

Die agtste Internasionale Bokkonferensie word van 4 tot 9 Julie op die kampus van die Universiteit van Pretoria gehou. Honderde afgevaardigdes en kenners van die bokbedryf van oor die wêreld word verwag.

Suid-Afrika is die vernaamste produsent van bokhaar en die bakermat van die Boerbok wat deesdae gesog is in talle lande. Bokke het 'n vername rol om te speel in ontwikkelende lande om mense van vleis en melk te voorsien.

Lesings sal op die kongres aangebied word oor vleisproduksie in landbou-onvriendelike omgewings, die ontwikkeling van bokmelkproduksie-eenhede, die bemarking van bokprodukte, voedingstandaarde vir bokke, genetiese diversiteit van bokke, prestasietoetsing en aantekening, energiebehoeftes van vrylopende bokke, reproduksie-eienskappe, gehaltestandaarde vir bokprodukte en internasionale vennootskappe in die bokbedryf, om net 'n paar van die onderwerpe te noem.

Navrae: Mee. Carina Visser of Darlynne Louw by 012 420 6029 of 021 420 3276. Die e-posadres is icgsa@postino.up.ac.za

2 Julie 2004