Invoer en duur voer knel pluimveebedryf

As betrokkenes in die pluimveebedryf voel dat kleinhandelaars hulle onregverdig behandel, sou die Mededingingskommissie bereid wees om ondersoek in te stel, sê adv. Menzi Simelane, kommissaris van dié kommissie.

Sommige kettingwinkels se invoer van hoendervleis en hul praktyke is op die Suider-Afrikaanse Pluimveevereniging se kongres in Somerset-Wes uitgelig as een van die redes waarom dié bedryf tans sukkel.

Mnr. Zach Coetzee, uitvoerende direkteur van die vereniging, sê die supermarkte "het 'n dinamika in beweging gestel wat verreikende gevolge gaan hê. Dit het die sterk mag van die kleinhandel oor hul gevange voorsieners beklemtoon." Dit dwing die bedryf op sy knieë.

Hy sê die invoer van hoendervleis, uit hoofsaaklik Brasilië, in veral die laaste kwartaal van verlede jaar het die plaaslike mark oorstroom, en in die eerste kwartaal van vanjaar tot 'n groot daling in pryse gelei. Verlede jaar is 93 564 ton hoendervleis ingevoer, teenoor 77 842 ton in 2001. Invoer gaan teen hoë vlakke voort.

Hoë insetkoste, grootliks weens die hoë mielieprys, was die ander groot oorsaak dat verlede jaar besonder moeilik was vir die bedryf. Dinge lyk nog nie veel beter nie, omdat baie boere hulself teen die hoë mielieprys verskans het en nie verwag het dat die rand so skerp sou verstewig en die mielieprys sou afdwing nie. Die sterk rand het uitvoer ernstig geknou en bygedra tot 'n plaaslike ooraanbod.

Mnr. Coetzee sê die totale styging in die produksiekoste van braaikuikens was verlede jaar sowat 22 %, terwyl die gemiddelde netto produsentepryse met net 11 % gestyg het.

Die eierbedryf het 'n styging in gemiddelde netto inkomste van R4,22 tot R4,93 per dosyn getoon, wat 8 % meer is vir boere. Terselfdertyd het produksiekoste met 28 % gestyg. 'n Ligpunt was eieruitvoer, wat danksy die gunstige rand met 115,5 % van 253 000 kiste tot 535 000 kiste gestyg het. Dié voordeel is nou omgekeer weens die skerp verstewiging van die geldeenheid.