Invoer van langlewe-melk kwel

'n Afsonderlike tarief vir ingevoerde langlewe-melk (UHT) sal na verwagting binne die volgende twee weke in werking tree ingevolge 'n aanbeveling deur die Kommissie vir Internasionale Handelsadministrasie (ITAC).

Melk SA se aansoek om 'n verhoging van die invoertarief op UHT-melk het nie geslaag nie omdat die ITAC meen die hoeveelhede wat ingevoer word, regverdig dit nie.

Die kommissie het 'n afsonderlike doeanetarief daarvoor aanbeveel om dit vir die suiwelbedryf makliker te maak om die invoer in die toekoms te monitor en aansoek te doen om tariefbystand.

Melk SA monitor die invoer weekliks en het die aansoek ingedien weens 'n toename in invoer teen lae pryse, in sommige gevalle tot R2,80/liter vry aan boord, sê me. Barbara Bieldt, bestuurder van internasionale handel by Melk SA.

Die kommissie het te kenne gegee dat hy bereid sal wees om vinnig op te tree as sulke invoer aansienlik toeneem.

Die suiwelbedryf is bekommerd oor die onlangse invoer van UHT-melk van twyfelagtige oorsprong en gehalte deur kettingwinkels en het die stap verwelkom.