Jagbedryf vies oor aantygings

Wildbedryf Suid-Afrika (WRSA) is woedend oor aantygings deur ‘n omgewingsorganisasie, Animal Rights Africa (ARA), dat die “jagbedryf op die uitbuiting van diere, wreedheid en die vernietiging van biodiversiteit berus.”

Luidens ‘n berig in Beeld (5 Julie) het ARA onlangs ‘n verslag, “Hunting in South Africa: a bloody mess” uitgereik.

Die organisasie het glo in die verslag daarna verwys dat hoewel die jagbedryf jaarliks R754 miljoen vir Suid-Afrika verdien, dit dikwels op die uitbuiting van diere berus. Die koerant haal me. Michele Pickover, ‘n woordvoerder vir ARA aan: “Daar is bitter min sprake van etiek.”

Volgens die verslag word sowat een miljoen diere jaarliks geslag, meestal vir hulle horings, pels of “sommer net vir die lekker. Suid-Afrika is Afrika se gewildste bestemming vir buitelanders wat enigiets van olifante en renosters tot duikers wil jag. Baie Suid-Afrikaners jag ook vir ontspanning. Stropery, veral van renosters, vier hoogty. Hiermee saam boet Suid-Afrika sy biodiversiteit in.”

Pickover meen glo die Regering moet ‘n kommissie aanstel om die bedryf te ondersoek.

WRSA kap terug
“Die Suid-Afrikaanse jagbedryf berus op die volhoubare benutting van diere,” antwoord mnr. Jacques Malan, voorsitter van WRSA, in ‘n verklaring aan die ARA.

Hy sê daar is wel ‘n sosiale ervaring en ‘n ontspanningsaspek wat met jag saamgaan: “Die samesyn rondom 'n kampvuur in die veld waar jy kan vergeet van jou daaglikse bedrywighede en probleme, is verseker die hoogtepunt van 'n jagtog. Die geselskap rondom so 'n kampvuur is iets wat nie net geniet word deur mans nie, maar ook deur vrouens, families en kinders”.

Malan wys daarop dat diere in die natuur aanteel in ’n verhouding van 50% manlik en 50% vroulik, maar dat ‘n baie klein persentasie manlike diere nodig is vir teling en die voortbestaan van ‘n spesie. “Jag is dus 'n noodsaaklike oesmetode vir die volhoubare benutting en voortbestaan van wild.”

Volgens Malan gaan die geld wat met die verkoop van 'n jagtog en wild gegenereer word, gebruik om die voortbestaan van spesies te verseker. Dit is vir die instandhouding en onderhoud van die plaas asook die verskaffing van water en voer gedurende droogtes.

Pickover 'moet kom gesels'
Malan nooi Pickover uit om met hulle te gesels “sodat sy nie as gevolg van onkunde of as gevolg van bevooroordeelde navorsing die jagbedryf wil aftakel nie. Ons is oortuig daarvan dat die Regering genoeg wetgewing in plek het om onwettige jagpraktyke te reguleer. Die Regering doen moeite om met die jagbedryf in verbinding te bly en om te poog om die oortreders vas te vat.”

Hy sê verder egter dat dit nie saak maak hoe goed die wetgewing is nie, “jy sal nooit die skelm deur wetgewing kan beheer nie. Dit is dus belangrik om enige wanpraktyke so vinnig as moontlik onder die wildboer en jagorganisasies se aandag te bring.”

Bron: Beeld

Die ARA-dokument

7 Julie 2010