Japie hoop Thabo gebruik di

Sy grootste wens is dat President Thabo Mbeki vir die boere van die land moet sê dat hulle vir die land nodig is. Hy kan die geleentheid op die jaarlikse kongres van Agri SA benut om vir boere te vertel waarom hulle belangrik vir die land is.

Mnr. Japie Grobler, voorsitter van Agri SA, het op die kongres van Vrystaat Landbou in Bloemfontein gesê pres. Mbeki moet op die kongres die slagspreuke teen en aanvalle op boere veroordeel en nie net daarop reageer as dit reeds plaasgevind het en hy om kommentaar gevra word nie.

"Dit is onaanvaarbaar dat druk eers op die Regering toegepas moet word voor hy sê die landbou is belangrik."

Hy het gesê dit is belangrik dat binne die volgende vyf tot tien jaar 'n sukses gemaak word van die vestiging van nuwe boere. "Ons moet nie 22 jaar wag voor die probleme aangepak word soos in Zimbabwe nie."

Boere moet nie hul rol in die vestiging van nuwe boere onderskat nie. Hulle moet help om mense te vestig wat hulle as boere bewys het. Dit is nie net die Regering se probleem nie.

Hy is opgewonde oor geleenthede in die landbou wat 'n paar jaar gelede nie bestaan het nie. Boere moet ook in die goeie tye wat nou beleef word, skuld afbetaal omdat dit een van die grootste probleme van die verlede is. "Dit help om uit 'n posisie van mag te praat."

Mnr. Grobler het gesê die landbouplan wat in November onderteken is, lê nie en stof vergader nie. Dit word al die afgelope twee tot drie jaar toegepas.