Jong boer vir uitruil gesoek

Benoemings vir 'n jong boer van die Vrystaat om as deel van 'n uitruilprogram met die Gerhard van Eeden-gedenkfonds op 'n plaas in Amerika te gaan werk, word ingewag.

Die Amerikaanse organisasie Communicating for Agriculture (CA) stel jaarliks ter nagedagtenis aan Gerhard van Eeden, wat op 25 September 2000 in 'n ongeluk gesterf het, $2 000 (sowat R12 600) beskikbaar vir 'n jong boer van die Vrystaat om op 'n plaas in Amerika te gaan werk.

Ongetroude kandidate van 18 tot 28 jaar oud, wat gesond is en geen misdaadgeskiedenis het nie, sal in aanmerking kom. Die kandidate moet van plan wees om 'n toekoms in die landbou te maak en praktiese ervaring in sy/haar belangstellingsveld het.

Benoemings moet voor Vrydag 16 Julie by Vrystaat Landbou se kantoor in Bloemfontein wees. Vir meer inligting bel mev. Willa Green by 051 447 7671 of 082 388 0088.