Katoen kan help met ontwikkeling in Afrika

Katoen behoort 'n groot rol te speel in die bereiking van die doelwitte van die nuwe vennootskap vir Afrika se ontwikkeling (Nepad), veral ten opsigte van die opheffing van dié vasteland se mense, sê dr. Nthoana Tau-Mzamane, voorsitter van die Landbounavorsingsraad (LNR).

Sy was een van die sprekers op die Wêreld Katoennavorsingskonferensie in Kaapstad.

Dr. Tau-Mzamane sê die LNR lewer 'n noodsaaklike bydrae tot katoennavorsing in Suid-Afrika, onder meer in die ontwikkeling van nuwe kultivars en die aanpassing van ingevoerde kultivars. Sy glo die LNR se Instituut vir Industriële Gewasse het die vermoë en kundigheid om aan te hou om die landbou hier en elders in Suider-Afrika te bedien.

Sy het waardering vir die bydrae wat groot kommersiële boere tot die bedryf maak, maar wil graag sien dat kleinboere se reeds belangrike rol verder uitgebrei word.

Dr. Deon Joubert, direkteur van die instituut en voorsitter van die konferensie, sê katoen is wêreldwyd die grootste bron van natuurlike vesel en speel 'n belangrike rol in die wêreldekonomie. Hy glo katoenproduksie in Afrika sal stabiliteit, rykdom en werksgeleenthede skep.

Die Wes-Kaapse minister van landbou, toerisme en dobbelary, mnr. Johan Gelderblom, het Katoen Suid-Afrika geloof vir sy verbintenis tot grondhervorming en die bemagting van kleinboere. Dié organisasie wil hê dat kleinboere binne 10 jaar 30 % van die binnelandse oes moet lewer.