Klag teen Eskom by Openbare Beskermer

Die Vryheidsfront Plus (VF Plus) het ‘n formele klag oor beweerde gebrekkige bestuursvaardighede binne Eskom by die Openbare Beskermer (OB) gelê.

Luidens ‘n verklaring van die party het hy voorheen onderneem om die saak na die OB te verwys sodra Nasionale Energiereguleerder (Nersa) se besluit oor kragtariefverhogings bekend gemaak is.

“Daar blyk soveel aanduidings van onreëlmatighede binne Eskom te wees dat dit ‘n onafhanklike en volledige ondersoek deur die OB regverdig,” sê adv. Anton Alberts, die party se parlementêre woordvoerder oor energie.

Verlaagde tariewe vir 138 maatskappye?
Alberts sê wat tot die klag bygedra het is die bekendmaking van die feit dat Eskom krag teen ‘n drasties verlaagde tarief aan 138 onbekende maatskappye verskaf.

Die maatskappy weier glo om, op grond van kontraktuele terme, aan die betrokke ministers en die Parlement bekend te maak wie die maatskappye is, en wat die motivering vir die lae tarief is.

Inkomste uit die landbou en huishoudings
Die VF Plus meen dit beaam die standpunt dat Eskom oormatig steun op die inkomste wat van huishoudings en die landbou ontvang word, en dit gebruik om ander bedrywe in die geheim te subsidieer.

“In dié verband gaan die VF Plus ‘n aansoek aan Eskom rig, in terme van die Wet op Bevordering van Toegang tot Inligting, om bekend te maak wie die maatskappye is wat bevoordeel word, teen watter tarief, asook die terme van die kontrak in elke geval. Dit is die party se mening dat Eskom nie sal kan skuil agter die feit dat die kontraktuele terme van vertroulikheid hom verbind tot geheimhouding nie,” verduidelik Alberts.

Die party is ook van plan om verdere ondersoek in te stel na die geldigheid van Nersa se besluit om ‘n verhoging in tariewe aan Eskom toe te staan. Dít in die lig daarvan dat Eskom ‘n wesenlike wanvoorstelling geskep het in sy tariefaansoek deur nie melding te maak van die gesubsidieerde kontrakte nie.

Subsidies aan boere
Intussen berig Landbouweekblad in die uitgawe van 12 Maart dat daar ‘n moontlikheid bestaan dat die landbousektor wel ‘n kragsubsidie kan ontvang. Dit volg nadat pres. Jacob Zuma ‘n duidelike mandaat gegee het aan ministers verantwoordelik vir die ekonomiese en energiesektore om met ‘n volhoubare plan rakende elektrisiteitstariewe vorendag te kom.

‘n Interministeriële taakspan is aangestel om die Regering se finansieringsmodel vir Eskom en ander energiekwessies in die land te bekyk.

11 Maart 2010